Lakbay-myxomycetes sa kagubatan ng Mindoro: ano-ano ang nagtatago?
May-akda: Melissa H. Pecundo, Nikki Heherson A. Dagamac, at Thomas Edison E. dela Cruz
Isinalin ni: Francynne Lee
Makalipas ang ilang milyong taon, nahiwalay mula sa pangunahing lupain ng Asya ang isla ng Mindoro. Dahil dito, nagkaroon ng iba’t ibang uri ng hayop at halaman sa Mindoro na kakaiba sa Asya at iba pang isla ng Pilipinas. Sa pag-aaral na ito, dalawang kagubatan — Mt. Malasimbo (MM) sa Puerto Galera, Oriental Mindoro, at Mt. Siburan (MS) sa Sablayan, Occidental Mindoro — ang sinuri para sa mga myxomycete. Mula sa sampling na oportunistiko sa field at sa pagbuo ng 1,260 moist chamber cultures, nakalikom ang pag-aaral ng 1,007 fruiting body collections na kumakatawan sa 50 sarihay (species) mula sa 17 urihay (genera). Mas maraming sarihay (49) ang naiulat sa Mt. Siburan kumpara sa Mt. Malasimbo (36). Sa mga ito, napag-alaman na 17 ang hindi karaniwang makikita, at apat (4) naman ang matatagpuan sa parehong kagubatan: Arcyria cinerea, Perichaena pedata, Diderma hemisphaericum, at Lamproderma scintillans. Mas magkakaiba-iba ang mga myxomycete sa Mt. Siburan kumpara sa Mt. Malasimbo, ngunit malinaw ang pagkakatulad ng dalawang kagubatan sa komposisyon ng mga sarihay (CC = 0.80) at kasaganaan (PS = 0.72). Mahihinuha mula rito na mataas ang dibersidad ng myxomycete sa mga kagubatan ng Mt. Malasimbo at Mt. Siburan. Ang pag-aaral na ito ay ang pinaka-komprehensibong pagsisiyasat ng mga myxomycete sa Mindoro.
Sanggunian
Pecundo, M. H., Dagamac, N. H., & dela Cruz, T. E. (2020). A comparative diversity study of myxomycetes in the lowland forests of Mt. Malasimbo and Mt. Siburan, Mindoro Island, Philippines. Karstenia, 275–291. https://doi.org/10.29203/ka.2020.500
